*Көлік инфрақұрылымы
Тараз қаласын дамытудың кешенді үш жылдық жоспары көлік инфрақұрылымын жаңартуды және жаңғыртуды қарастырады. Осы жоспар аясында үш жыл ішінде Таразда электронды тақтасы бар жаңа аялдамалар пайда болады, автобус паркі жаңартылады және жаңа жолаушы тасымалдау бағыттары қосылады.
Таразда қалалық қоғамдық жолаушылар көлігіне тоғыз тасымалдаушы компания қызмет көрсетеді. Қытай үлгісіндегі ескірген автобустар соңғы бірнеше жылда жаңа және әдемі автобустармен алмастырылды. Қоғамдық көліктің шамадан тыс жүктелуі мәселесін шешу үшін субсидиялар бөлінеді. Бюджеттен 2,2 млрд теңге бөлінді. Алдағы үш жылда жергілікті билік автопаркті жаңартып, шалғайдағы тұрғын үй массивтерін жаңа бағыттармен қамтуды көздеп отыр.
Айта кету керек, 2019 жылдан бастап 154 автобус жеткізілді. 2022 жылы «Әулиеатранспасс» серіктестігі ZHONG TONG маркалы 20 автобус, «City bus» компаниясы Golden Dragon маркалы 12 жаңа автобус және «ТаразТрансМоторс» серіктестігі ПАЗ маркалы 7 автобус сатып алды. 2023 жылы қаланың автобус паркі 73 бірлікке жаңартылды. Таразға «Автобус паркі-2020» серіктестігі 70 жолаушы тасымалдау қабілеті бар 31 жаңа автобус жеткізді. № 34 бағытқа 12 жаңа автобус шықты, қалған 19-ын № 54 бағыттағы қытай үлгісіндегі ескірген автобустар ауыстырды.
2024 жылы қалаға 140 жаңа автобус жеткізіліп, үш жаңа бағыт іске қосылды. Қала тұрғындарының өтініштері бойынша бұрын тоқтатылған № 41 автобус маршруты қайта іске қосылды, қазір бұл бағыт бойынша 12 жаңа автобус қатынайды. Бұл шағын аудандарды, теміржол вокзалын, студенттік қалашық пен Химпоселокты жалғайтын облыс орталығының ең ұзын автобус бағыттарының бірі. Тасымалдаушы компания Өзбекстаннан «Isuzu» маркалы 14 автобус сатып алды, бұл ретте 12 автобус № 41 маршрут бойынша жүретін болады, ал қалған екеуі 8, 9 және 56 маршруттар бойынша резервте қалады. Автобустардың ұзындығы 9 метр, сыйымдылығы 70 адам, соның ішінде 25 орындық бар.
Облыс орталығының қоғамдық көлікке деген қажеттілігін толық жабу үшін 200 автобус қажет.
***
Облыс орталығында жол инфрақұрылымы да жаңартылуда. Жыл сайын қала көшелерінде көлік қозғалысының кестесі көрсетілген ақпараттық тақталармен жарақтандырылған жаңа қоғамдық көлік аялдамалары орнатылуда.
Аялдамалар адамдарды ыстық күн мен желден қорғап қана қоймай, қаланың сәулеттік келбетінің ажырамас бөлігі болады. 2023 жылы қала аумағында 36 автобус аялдамасы, 2024 жылы 75 аялдама орнатылды. Облыс орталығында автокөлік құралдарын жетілдіру және халықты жолаушылар тасымалы жүйесімен қамтамасыз ету үшін 2023-2025 жылдарға арналған іс-шаралар жоспары әзірленді.
***
Тараз қаласының тұрғындары үшін қоғамдық көлікте жол ақысының кезекті қымбаттауы жақында ғана болған. Жол жүру бағасы электрондық жол жүру картасы немесе қосымша электрондық төлем қызметі арқылы қолма-қол ақшасыз есеп айырысу арқылы 85 теңгеден 100 теңгеге дейін өсті. Жол ақысын қолма қол ақшамен төлеу бұрынғысынша — 130 теңге болып қалды. 7 жастан 18 жасқа дейінгі оқушылар мен жастар үшін жол жүру ақысы 40 теңгеден 50 теңгеге дейін өсті, ал қолма-қол ақшамен төлеу бұрынғы тариф бойынша 65 теңге (130 теңгеден 50%) қалды.
Әкімдікте хабарлағандай, жол жүру тарифін көтеру туралы шешім қосалқы бөлшектер мен жанар-жағармай материалдарының нарықтық бағасының өсуімен, жүргізушілер жалақысының көтерілуімен, сондай-ақ қаланың әлеуметтік-экономикалық дамуымен және тасымалдаушылардың шығындарына байланысты жергілікті бюджетке түсетін қаржы жүктемесінің төмендеуімен байланысты.
Соңғы рет Тараз автобустарында жол жүру тарифі 2021 жылдың сәуірінде 65 теңгеден 85 теңгеге дейін, оқушылар үшін 30 теңгеден 40 теңгеге дейін көтерілді. Ол кезде тасымалдаушылар қала билігінен жол ақысын 100 теңгеге дейін көтеруді сұраған, бірақ шенеуніктер тарапынан бұл ұсыныс қолдау таппады.
2021 жылы Таразда автобустарда электрондық билет жүйесі енгізілді. Тараздық жүргізушілер жолаушылар үшін «өзара жарысты» тоқтатып, сағат санына байланысты белгіленген жалақы бойынша қозғалыс кестесін сақтай отырып жұмыс істейді деп күтілді.
Облыс орталығының қалалық көлігінде жол жүру ақысын төлеудің электрондық жүйесі төлемнің бірнеше тәсілін көздейді. Бұл — автобустың QR немесе сандық коды, «TulparCard» көлік картасы немесе SMS-хабарлама және мобильді қосымша, сондай-ақ Kaspi QR көмегімен төлеу.
«Ақылды аялдама» жобасы аясында 2021 жылдан бастап облыс орталығында автобус бағыттары мен олардың келу уақыты көрсетілген жарықдиодты сандық тақталар орнатылады.
Жоспар бойынша үш жыл ішінде Таразда 120 жаңа аялдама, 90 электрондық тақта, 200 автобус, 15 жаңа жолаушылар маршруты пайда болады, жалпы алғанда автобустардың саны 460-қа дейін өседі.
5 000
No responses yet