Тараздағы жаңа нысандар
* Инженерлік инфрақұрылым және ТКШ
Тараз қаласының жас жұбайлары көп жылдар бойы нағыз сән-салтанатты, жоғары деңгейдегі үйлену сарайының салынуын армандаған еді. Биыл бұл арман орындалды – облыс орталығының ең ірі және қарқынды дамып келе жатқан шағын ауданы «Ұлы дала» аумағында заманауи талаптарға сай, салтанатты некелерді тіркеу орталығының жаңа ғимараты пайдалануға берілді.
Қызықтысы, 400 мыңнан астам тұрғыны бар, облыс орталығы мәртебесіне ие Тараз қаласында 2000-шы жылдардың басынан бастап осы уақытқа дейін некені лайықты және құрметті деңгейде тіркеуге арналған арнайы ғимарат мүлде болмаған еді.
Бұрын азаматтық хал актілерін тіркеу қызметі қаланың Орталық алаңындағы көрікті ғимаратта орналасқан еді. Сыртқы келбеті нағыз неке сарайына ұқсайтын бұл нысан – биік аркалы терезелерімен, салтанатты баспалдағы және сәулеттік нақыштарымен ерекше әсер қалдыратын. Алайда кейін бұл ғимарат әділет басқармасынан алынып, некелесу рәсімдері Қойгелді көшесіндегі Халыққа қызмет көрсету орталығына (ХҚКО) ауыстырылды.
Сол жерде бақытты жас жұбайлар ресми некеге тіркелу үшін қарапайым ХҚКО ғимаратының артқы жағындағы, бетон қоршаумен қоршалған «қара есік» арқылы кіріп, тар әрі жіңішке баспалдақпен ресми тіркеу кеңсесіне көтерілуге мәжбүр болды. Бұл жағдай неке рәсімдерінің салтанатты сипатына қарама-қайшы болып, жас жұбайлардың қуанышына көлеңке түсірді және рәсімнің абыройлы өтуіне кедергі болатын.
Қазақстан Республикасының «Неке (ерлі-зайыптылық) және отбасы туралы» заңы салтанатты неке рәсімдері өтетін бөлмелердің мемлекеттік тіркеу органы ғимаратында орналасуын міндеттейді. Ал дәл сол кезде некені тіркеумен айналысатын — яғни заңды некенің құқықтық фактісін ресми түрде тіркеп, мемлекеттік баж салығын қабылдап, куәлік беретін — қалалық әділет басқармасы ғана болды. Ол салтанатты рәсімдер өткізу, әсем баспалдақтарды безендіру немесе ғимаратты көркемдеу туралы ойланып бас қатырмайтын. Салтанатты сәттің есте қаларлықтай әдемі өтуі жас жұбайлардың еншісінде еді.
2015 жылы Тараз қаласындағы АХАЖ бөлімі Жүнісалиев көшесіндегі бес қабатты тұрғын үйдің бірінші қабатына көшірілді. Бірақ бұл да неке қию рәсімдерінің деңгейін арттыра қойған жоқ. Жеке меншік бастамамен ашылған салтанат залдарының қызметі көпшілікке қолжетімсіз болды.
Тек 2022 жылы қалада жаңа неке қию орталығының құрылысы басталды. Жергілікті билік өкілдері бұл нысанның заманауи стандарттарға сай болатынын айтып, онда салтанатты шаралар жоғары деңгейде өтуі үшін барлық қажетті жағдай жасалатынына уәде берді.
Жаңа салтанатты Неке қию сарайы облыс орталығының ең ауқымды шағын ауданы «Ұлы далада» орналасқан. Мұнда кең әрі сәнді салтанатты зал, фото аймақ, фуршет өткізуге арналған ыңғайлы кеңістік бар. Сонымен қатар күйеу жігіт пен қалыңдық үшін жеке бөлмелер қарастырылған. Залдың классикалық интерьері той мен салтанатқа лайық атмосфераны қалыптастырады.
Аталған орталықта тек некелерді тіркеу рәсімдері ғана емес, балалардың туылуына арналған салтанатты рәсімдер, мерейтойлар және басқа да маңызды отбасылық шаралар өткізіледі.
Жаңа ғимараттың ашылу салтанатына Жамбыл облысының әкімі Ербол Қарашөкеев қатысты.
— Неке қию орталығының ашылуы – мемлекеттік қызметтердің сапасын жақсартуға және тұрғындарға жайлы жағдай жасауға бағытталған маңызды қадам. Мемлекет басшысы бірнеше мәрте атап өткендей, мықты ел берік отбасы негізінде құрылады. Отбасы – қоғамның тірегі мен тіршілігінің орталығы. Сондықтан жаңа отбасын құру рәсімдері ерекше құрмет пен мәнге ие болуы тиіс. Бұл орталық – тек қызмет көрсету орны ғана емес, сонымен қатар отбасы институтын нығайтуға және ұлттық құндылықтарды алға жылжытуға арналған маңызды мәдени ошақ, — деді облыс әкімі.
Басқарма деректеріне сай, 2024 жылы Таразда алты мыңнан астам неке ресми түрде тіркелген. Ал 2025 жылдың алғашқы жартыжылдығында өңірде 1180 жаңа отбасы құрылды. Алда әлі күзгі неке маусымы басталатынын ескерсек, бұл көрсеткіш ұлғаюы әбден мүмкін.
No responses yet